Azərbaycan Respublikası, Gürcüstan və Türkiyə Cümhuriyyəti Bakı-Tbilisi-Ceyhan Xam Neft Boru Kəməri (BTC Boru Kəməri) layihəsini həyata keçirməyə razılıq vermişlər. BTC Ko şirkəti BP (Əməliyyatçı), ARDNŞ (Azərbaycan), TPAO (Türkiyə), Statoyl (Norveç), Yunokal (ABŞ), İtoçu (Yaponiya), Amerada Hess (ABŞ), Eni (İtaliya), TOTAL (Fransa), İNPEX (Yaponiya) və Konoko Filips (ABŞ) şirkətlərindən ibarətdir. Bu xüsusi xam neft boru kəməri sistemi Xəzər xam neftini Azərbaycandan Türkiyənin beynəlxalq bazarlara dənizlə çıxışı olan Ceyhan terminalına nəql edəcək. BTC boru kəmərinin Azərbaycanın ərazisində yerləşən hissəsi (443 km) Bakı şəhərinin yaxınlığındakı Səngəçal terminalından başlanır və Ağstafa rayonunda Böyük Kəsik qəsəbəsinin yaxınlığında Gürcüstan sərhədini kəsib keçir. Boru kəməri Ağstafa rayonuna çatana qədər Azərbaycan ərazisinin hüdudları daxilində Qaradağ, Abşeron, Hacıqabul, Ağsu, Kürdəmir, Ucar, Ağdaş, Yevlax, Goranboy, Samux, Şəmkir və Tovuz rayonlarından keçir.